દશેરાએ ફાફડા-જલેબીનો સ્વાદ માણવો મોંઘો પડશે, ભાવમાં ₹100 સુધીનો વધારો

અમદાવાદ સહિત ગુજરાતમાં દશેરાના પર્વ પર ફાફડા અને જલેબી ખાવાની પરંપરા વર્ષોથી ચાલી આવે છે. જોકે, આ વખતે દશેરાના દિવસે ફાફડા-જલેબીનો સ્વાદ માણવા માટે લોકોએ ગત વર્ષની સરખામણીએ વધુ ખર્ચ કરવો પડશે. કાચા માલના ભાવમાં થયેલા વધારાને પગલે વેપારીઓએ ફાફડા અને જલેબીના ભાવમાં કિલોદીઠ ₹50થી ₹100 સુધીનો વધારો કર્યો છે.

વેપારીઓના જણાવ્યા અનુસાર, છેલ્લા કેટલાક સમયથી ખાંડના ભાવમાં વધારો થઈ રહ્યો છે. આ ઉપરાંત, ખાદ્યતેલ સહિત અન્ય કાચા માલના ભાવમાં પણ વધારો થતાં ફાફડા-જલેબીના ઉત્પાદન ખર્ચમાં વધારો થયો છે. પરિણામે, વેપારીઓને ભાવ વધારવાની ફરજ પડી છે.

અમદાવાદ શહેરમાં હાલમાં ફાફડાના ભાવ કિલોદીઠ ₹700થી લઈને ₹1,500 સુધી જોવા મળી રહ્યા છે. જ્યારે જલેબીની વાત કરીએ તો તેના ભાવ કિલોદીઠ ₹800થી ₹1,400 સુધી પહોંચી ગયા છે. જોકે, ફાફડા અને જલેબીના ભાવ વિસ્તાર, દુકાન અને ગુણવત્તા પ્રમાણે અલગ-અલગ હોય છે. દશેરાના પર્વ દરમિયાન ફાફડા-જલેબીની માગમાં વધારો થતો હોવાથી બજારમાં પણ તેની ખરીદી માટે લોકોની ભીડ જોવા મળતી હોય છે. ત્યારે આ વખતે ભાવવધારાને કારણે તહેવારની મીઠાશ માણવા માટે લોકોએ ખિસ્સું થોડું વધારે હળવું કરવું પડશે.