CJPનું Instagram એકાઉન્ટ બ્લોક, અભિજિત દીપકેએ વ્યક્ત કર્યો આક્રોશ

કોકરોચ જનતા પાર્ટી (CJP) ના ઓફિશિયલ ઇન્સ્ટાગ્રામ પેજને બ્લોક કરી દેવામાં આવ્યું છે. CJP ના સ્થાપક અભિજિત દીપકેએ પોતે સોશિયલ મીડિયા દ્વારા આ અંગેની માહિતી આપી છે. સોશિયલ મીડિયા પ્લેટફોર્મ ‘X’ (ટ્વિટર) પર એક પોસ્ટ અને તસવીર શેર કરીને અભિજિત દીપકે ભારે આક્રોશ વ્યક્ત કર્યો છે અને પેજ હટાવનારાઓને ‘ડરપોક’ ગણાવ્યા છે.

સ્વતંત્રતા દિવસની સવારે જ તેમણે ટ્વિટર પર લખ્યું કે પાર્ટીનું ઇન્સ્ટાગ્રામ હેન્ડલ ડાઉન થઈ ગયું છે. તેમણે સ્ક્રીનશોટ શેર કરતા લખ્યું કે, “તેમણે ‘કોકરોચ જનતા પાર્ટી’નું ઓફિશિયલ ઇન્સ્ટાગ્રામ હેન્ડલ હટાવી દીધું. કેટલા મોટા ડરપોક છે!”

આ ઘટના પહેલાં અભિજિત દીપકેએ સ્વતંત્રતા દિવસની શુભકામનાઓ પાઠવવા માટે એક ખાસ તસવીર પસંદ કરી હતી. તેમણે NEET પેપર લીક વિરોધ પ્રદર્શન દરમિયાન દિલ્હીના જંતર-મંતર પર વિદ્યાર્થીઓ પર થયેલા લાઠીચાર્જની એક તસવીર શેર કરી હતી. આ તસવીર સાથે તેમણે લખ્યું હતું કે, “સ્વતંત્રતા દિવસની શુભકામનાઓ. આ તસવીર આપણા માટે એક રિમાઇન્ડર છે કે આપણે હજુ પણ ખૂબ લાંબો અગ્નિપથ કાપવાનો બાકી છે.”