Commonwealth Games 2026: કૉમનવેલ્થ ગેમ્સમાં ભારતની ધૂમ, લવપ્રીતે સિલ્વર મેડલ અને સીમાએ બ્રોન્ઝ મેડલ જીત્યો

સ્કોટલેન્ડના ગ્લાસગોમાં ચાલી રહેલી કોમનવેલ્થ ગેમ્સમાં ભારતીય ખેલાડીઓએ પોતાનું પ્રભાવશાળી પ્રદર્શન ચાલુ રાખ્યું છે. સ્ટાર ભારતીય વેઇટલિફ્ટર લવપ્રીત સિંહે પુરુષોની +110 કિગ્રા કેટેગરીની ફાઇનલમાં દેશ માટે સિલ્વર મેડલ જીત્યો હતો. દરમિયાન, સીમા કલીરામનાએ મહિલા ડિસ્કસ થ્રો સ્પર્ધામાં બ્રોન્ઝ મેડલ જીત્યો હતો. લવપ્રીત સિંહે કુલ 388 કિગ્રા વજન ઉપાડીને બીજું સ્થાન મેળવ્યું. તેણે સ્નેચ રાઉન્ડમાં 176 કિગ્રા અને ક્લીન એન્ડ જર્કમાં 212 કિગ્રા વજન ઉપાડ્યું. આ બે મેડલ સાથે ભારતે હવે કુલ 16 મેડલ (3 ગોલ્ડ, 10 સિલ્વર અને 3 બ્રોન્ઝ) જીત્યા છે.

સ્નેચ સ્પર્ધા પછી ન્યૂઝીલેન્ડના ડેવિડ લિટીએ લવપ્રીતથી 10 કિલો ઓછું વજન ઉપાડ્યું હતું. જોકે, ક્લીન એન્ડ જર્કના બીજા રાઉન્ડમાં ડેવિડે 223 કિગ્રા વજન ઉપાડીને કોમનવેલ્થ ગેમ્સનો નવો રેકોર્ડ બનાવ્યો. આ સાથે તે કુલ 389 કિલોગ્રામ વજન સાથે લવપ્રીતથી માત્ર 1 કિલોગ્રામ આગળ રહ્યો અને ગોલ્ડ મેડલ જીત્યો.

લવપ્રીત સિંહે માત્ર 1 કિલોગ્રામના નાના અંતરથી ગોલ્ડ મેડલ ચૂકી ગયા બાદ નિરાશા વ્યક્ત કરી હતી. તેમણે ANI ને કહ્યું, “હું ગોલ્ડ મેડલ જીતવાનું ચૂકી ગયો. સ્વાભાવિક રીતે જ્યારે તમે ગોલ્ડ ચૂકી જાઓ છો ત્યારે દુઃખ થાય છે. હું એશિયન ગેમ્સ જેવી આગામી સ્પર્ધાઓમાં વધુ સારું પ્રદર્શન કરીશ.”તેમણે વધુમાં કહ્યું, “હું આ મેડલ મારા કોચ વિજય શર્મા, ભારતીય વેઇટલિફ્ટિંગ ફેડરેશનના સહદેવ સર, ભારત સરકાર અને ભારતીય નૌકાદળના કેપ્ટન વિજય કુમારને સમર્પિત કરવા માંગુ છું. તેમણે બધાએ મને ખૂબ ટેકો આપ્યો છે અને હું તે બધાનો ખૂબ ખૂબ આભાર માનું છું.”

ટ્રેક અને ફિલ્ડમાંથી ભારત માટે પણ સારા સમાચાર આવ્યા. ભારતીય ખેલાડી સીમા કલીરામનાએ મહિલા ડિસ્કસ થ્રો ફાઇનલમાં 58.65 મીટરના શાનદાર થ્રો સાથે બ્રોન્ઝ મેડલ જીત્યો.