સિંહનો આતંક: રબારીકા ગામે ઘરમાં સૂતા વૃદ્ધ પર હુમલો, છેલ્લા એક મહિનામાં વધ્યા માનવ પર હુમલાના બનાવ
અમરેલી જિલ્લામાં સિંહોના માનવ વસાહત તરફ વધતા આવાગમન વચ્ચે વધુ એક ચિંતાજનક ઘટના સામે આવી છે. તુલસીશ્યામ રેન્જ હેઠળ આવેલા રબારીકા ગામમાં મોડી રાત્રે ઘરમાં સૂતા વૃદ્ધ પર સિંહે હુમલો કરતાં સમગ્ર વિસ્તારમાં ભય અને રોષનો માહોલ સર્જાયો છે.
મળતી માહિતી મુજબ, રવજીભાઈ સેંજલિયા પોતાના ઘરે સૂતા હતા ત્યારે અચાનક સિંહ ઘરમાં ઘૂસી આવ્યો અને તેમના પર હુમલો કર્યો. હુમલામાં તેમને માથાના ભાગે ગંભીર ઈજા પહોંચી હતી. પરિવારજનો અને ગ્રામજનોએ તાત્કાલિક તેમને સારવાર માટે હોસ્પિટલમાં ખસેડ્યા હતા, જ્યાં તેમની સારવાર ચાલી રહી છે.
ઘટનાની જાણ થતાં જ વન વિભાગની ટીમ રબારીકા ગામે પહોંચી હતી અને સમગ્ર વિસ્તારનું નિરીક્ષણ કરીને તપાસ શરૂ કરી છે. સાથે જ સિંહની હિલચાલ પર નજર રાખવા માટે પેટ્રોલિંગ પણ વધારવામાં આવ્યું છે.
અમરેલી અને ગીર પંથકમાં છેલ્લા એક મહિનાથી સિંહોના માનવ વસાહતમાં પ્રવેશ અને હુમલાની ઘટનાઓમાં વધારો જોવા મળી રહ્યો છે. પશુઓ પરના હુમલાની સાથે હવે લોકો પણ નિશાન બનતા સ્થાનિકોમાં ડરનો માહોલ સર્જાયો છે.
તાજેતરમાં જ ખાંભા તાલુકાના ચતુરી ગામમાં પાંચ વર્ષના જિયાન પર સિંહે જીવલેણ હુમલો કર્યો હતો, જેમાં બાળકનું મોત થયું હતું. આ ઘટનાએ સમગ્ર રાજ્યમાં ભારે ચકચાર મચાવી હતી. ત્યારબાદ પણ વિવિધ ગામોમાં સિંહો માનવ વસાહતમાં ઘૂસવાના બનાવો સામે આવ્યા છે.