Jamnagar News: દેશભરમાં NEET પેપર લીક વિવાદ હજુ શમ્યો નથી ત્યાં ગુજરાતમાં વધુ એક પરીક્ષાના પ્રશ્નપત્ર લીક થવાની આશંકાએ શિક્ષણ વ્યવસ્થાને લઈને ગંભીર સવાલો ઊભા કર્યા છે. જામનગર સ્થિત ગુજરાત આયુર્વેદ યુનિવર્સિટીમાં BAMS ત્રીજા વર્ષના MS શલ્ય તંત્ર-1 વિષયની પરીક્ષામાં પેપર લીક થયાની શંકા વ્યક્ત કરવામાં આવી રહી છે.
20 જુલાઈએ યોજાયેલી પરીક્ષા પહેલા વોટ્સએપ પર કેટલાક સંભવિત પ્રશ્નો વાયરલ થયા હતા. બાદમાં પરીક્ષામાં પૂછાયેલા 12 પ્રશ્નોમાંથી 11 પ્રશ્નો વાયરલ થયેલી યાદી સાથે મેળ ખાતા હોવાનું સામે આવતા સમગ્ર મામલો ચર્ચાનો વિષય બન્યો છે. વિદ્યાર્થીઓએ નિષ્પક્ષ તપાસ અને દોષિતો સામે કડક કાર્યવાહી કરવાની માંગ કરી છે.
ABVP અને NSUIનો ઉગ્ર વિરોધ
મામલો સામે આવ્યા બાદ વિદ્યાર્થી સંગઠનોમાં ભારે રોષ જોવા મળ્યો છે. ABVPના કાર્યકરોએ યુનિવર્સિટી કેમ્પસ ખાતે વિરોધ પ્રદર્શન કરીને કુલપતિના રાજીનામાની માંગ કરી હતી. તેમનું કહેવું છે કે પેપર લીકથી હજારો વિદ્યાર્થીઓની મહેનત પર પાણી ફરી વળ્યું છે અને જવાબદારો સામે કડક પગલાં ભરવા જોઈએ.
બીજી તરફ NSUIએ પણ યુનિવર્સિટી તંત્ર પર ગંભીર આરોપ લગાવ્યા છે. NSUIનું કહેવું છે કે યુનિવર્સિટીને એક સપ્તાહ પહેલાંથી સમગ્ર ઘટનાની જાણ હોવા છતાં કોઈ અસરકારક કાર્યવાહી કરવામાં આવી નહોતી. સંગઠને પોલીસ ફરિયાદ નોંધાવી જવાબદારો સામે ફોજદારી કાર્યવાહી કરવાની માંગ કરી છે.
ત્રણ સભ્યોની તપાસ સમિતિ રચાઈ
યુનિવર્સિટીના ઇન્ચાર્જ વાઈસ ચાન્સેલર નરેશ જૈને જણાવ્યું કે સમગ્ર ઘટનાની તપાસ માટે ત્રણ સભ્યોની ઉચ્ચસ્તરીય સમિતિની રચના કરવામાં આવી છે, જેમાં પ્રિન્સિપાલ કક્ષાના બે અધિકારીઓનો સમાવેશ થાય છે.
તેમણે જણાવ્યું કે પરીક્ષા પૂર્ણ થયા બાદ પેપર લીકની માહિતી સામે આવી હતી અને તમામ પાસાઓની ઊંડાણપૂર્વક તપાસ શરૂ કરવામાં આવી છે. જરૂર પડશે તો પોલીસ તપાસ પણ કરાવવામાં આવશે. તપાસ સમિતિના અહેવાલના આધારે અંતિમ નિર્ણય લેવામાં આવશે અને વિદ્યાર્થીઓના હિત સાથે કોઈ સમાધાન કરવામાં નહીં આવે.
અમદાવાદમાં યુથ કોંગ્રેસનો વિરોધ
આ ઘટનાના પડઘા અમદાવાદ સુધી પહોંચ્યા છે. ઇન્કમટેક્સ ચાર રસ્તા પાસે યુથ કોંગ્રેસના કાર્યકરોએ વિરોધ પ્રદર્શન કરીને રાજ્યના શિક્ષણ મંત્રીના રાજીનામાની માંગ કરી હતી. પોલીસે વિરોધ કરી રહેલા કાર્યકરોની અટકાયત કરી હતી.
યુથ કોંગ્રેસનું કહેવું છે કે જો રાજ્યમાં વારંવાર પેપર લીકની ઘટનાઓ બનતી હોય અને તેને રોકવામાં સરકાર નિષ્ફળ જાય તો જવાબદારી સ્વીકારી શિક્ષણ મંત્રીએ રાજીનામું આપવું જોઈએ.
પરીક્ષા પ્રણાલીની વિશ્વસનીયતા પર ફરી સવાલ
હાલ યુનિવર્સિટી સાથે સંકળાયેલી 20થી 25 આયુર્વેદિક કોલેજોમાં અન્ય વિષયોની પરીક્ષાઓ અગાઉથી નક્કી થયેલા કાર્યક્રમ મુજબ ચાલુ છે. જોકે, NEET વિવાદ બાદ હવે ગુજરાત આયુર્વેદ યુનિવર્સિટીમાં પેપર લીકની શંકાએ રાજ્યની પરીક્ષા પ્રણાલીની વિશ્વસનીયતા પર ફરી ગંભીર સવાલો ઊભા કર્યા છે.
હવે વિદ્યાર્થીઓ, વાલીઓ અને શિક્ષણજગતની નજર તપાસ સમિતિના અહેવાલ પર ટકેલી છે. જો તપાસમાં પેપર લીકની પુષ્ટિ થશે તો જવાબદારો સામે કાનૂની અને વહીવટી કાર્યવાહી કરવામાં આવશે તેવી યુનિવર્સિટી તરફથી ખાતરી આપવામાં આવી છે.