સુપ્રીમ કોર્ટે સહારા ગ્રુપના પ્રમુખ સુબ્રતો રોયને 28 ફેબ્રુઆરી સુધીમાં હાજર રહેવાનો આદેશ કર્યો છે. કોર્ટે સેબી સહારા મામલામાં રોકાણકારોના પૈસા પરત કરવા માટે 25,700 કરોડ રૂપિયા જમા ન કરવા બદલ ગુરૂવારે આ આદેશ કર્યો છે. કોર્ટે કહ્યું કે અમે સહારાને પૈસા પરત કરવા માટે છ મહીનાનો સમય આપ્યો હતો. કંપનીએ આ ગાળામાં બધા રૂપિયા પરત મોકલાવ્યા નથી. જેના કારણે કોર્ટનો ભરોસો ઘટ્યો છે.
ચીફ જસ્ટિસ રંજન ગોગોઈ, જસ્ટિસ એ કે સીકરી અને જસ્ટિસ એસ કે કોલની ખંડપીઠે કહ્યું કે અમે ગત આદેશમાં ગ્રુપને રૂપિયાની વ્યવસ્થા કરવાનો આદેશ આપ્યો હતો. ગ્રુપે અત્યાર સુધીમાં માત્ર 1 હજાર કરોડ રૂપિયા જ જમા કરાવ્યા છે. ખંડપીઠે કહ્યું કે હવે અમે આ મામલામાં આગળ વધીશું. કાયદો તેનું કામ કરશે. સુબ્રતો રોય અને બીજા ડાયરેક્ટરો પોતે નક્કી કરવામાં આવેલી તારીખે કોર્ટમાં ઉપસ્થિત રહે.
સુબ્રતો રોય 4 માર્ચ 2014એ જેલમાં ગયા હતા. બાદમાં 6 મે 2016ના રોજ તેમની માતાનું મૃત્યુ થયું હતું. તેમના અંતિમ સંસ્કારમાં સામેલ થવા માટે તેમને પેરોલ આપવામાં આવી હતી. પછીથી આ પેરોલ વધતી રહી.