ભારતની બેડમિન્ટન ખેલાડી પી.વી.સિંધુએ બેડમિન્ટન વર્લ્ડ ફેડરેશનવર્લ્ડ ફાઇનલ્સના ગ્રુપ સ્ટેજમાં ચાઈનીઝ તાઇપાઇની તાઈ ઝૂ યિંગને 14-21, 21-16 અને 21-18થી હરાવી સતત બીજો મુકાબલો જીત્યો છે. તાઈ ઝૂ યિંગે પહેલી ગેમમાં લીડ છતા મેચમાં હારનો સામનો કરવો પડ્યો હતો. ઝૂ યિંગને આ મુકાબલા માટે ફેવરિટ માનવામાં આવી રહી હતી અને તેણે પહેલી ગેમમાં સિંધુને સતત ક્રોસમાં રમાડી 21-14થી માત પણ આપી હતી.
પહેલી ગેમમાં મળેલી માત છતાં સિંધુએ હાર સ્વીકારી ન હતી. તેણે બીજી ગેમ 21-16થી જીતીને શાનદાર રીતે કમબેક કર્યું હતું. તે બાદ ફાઇનલ ગેમમાં ફરી એક વખત ઝૂ યિંગ પોતાની આગવી રમત દેખાડી હતી. તેણે 11-6ની લીડ સાથે ઔપચારિકતા પુરી કરીને મેચ જીતી જશે તેવું જણાતું હતું। તેવામાં ભારતની સિંધુએ બરાબરની ટક્કર આપી હતી. સિંધુએ 6-11થી 21-18સુધીની સફરમાં વર્લ્ડનંબર1ને આક્રમક સ્મેશ અને નેટ પર રમાડીને તેના હાથથી મેચ ઝૂંટવી લીધી હતી. આ જીત બાદ સિંધુનું સેમી ફાઇનલમાં સ્થાન લગભગ સુનિશ્ચિત થઇ ગયું છે. સિંધુનો આગામી મુકાબલો શુક્રવારના રોજ અમેરિકાની ઝહાન્ગ બીએવેં સામે છે.