ભારતીય ટીમના સ્ટાર ફાસ્ટ બોલર મોહમ્મદ શમીએ ટેસ્ટ ક્રિકેટમાંથી નિવૃત્તિ લેવાનો નિર્ણય કર્યો છે. તેણે સોશિયલ મીડિયા પર એક ભાવુક વીડિયો શેર કરીને આ નિર્ણયની જાહેરાત કરી. પોતાના X એકાઉન્ટ દ્વારા શમીએ ચાહકોને દિવાળીની શુભેચ્છા પાઠવવાની સાથે જ ટેસ્ટ ક્રિકેટમાંથી નિવૃત્તિની જાહેરાત પણ કરી.
મોહમ્મદ શમીએ લખ્યું, “હું સફેદ જર્સીને અલવિદા કહી રહ્યો છું, પરંતુ તેની સાથે જોડાયેલી યાદોને ક્યારેય નહીં. જ્યારે મેં પહેલીવાર ભારતની ટેસ્ટ જર્સી પહેરી હતી, ત્યારે મારું એક જ સપનું હતું મારા દેશ માટે કંઈક મહત્વપૂર્ણ કરી બતાવવું. ત્યારથી, દરેક વિકેટ, દરેક સંઘર્ષ, દરેક ઈજા અને દરેક વાપસીએ મને કંઈક મૂલ્યવાન શીખવ્યું છે. મારા માટે, ટેસ્ટ ક્રિકેટ માત્ર એક ફોર્મેટ નથી, તે મારા જીવનનો અત્યંત ખાસ હિસ્સો રહ્યો છે. આજે, ભારે હૃદય અને સુંદર યાદોના સંગ્રહ સાથે, મેં ટેસ્ટ ક્રિકેટમાંથી નિવૃત્ત થવાનો નિર્ણય લીધો છે.”
મોહમ્મદ શમીએ વધુમાં લખ્યું, “મારા તમામ સાથી ખેલાડીઓ, કોચ, મારા પરિવાર અને લાખો ભારતીયોનો હૃદયપૂર્વક આભાર, જેઓ આ સમગ્ર સફરમાં સારા અને મુશ્કેલ બંને સમયમાં મારી સાથે ઊભા રહ્યા. હું BCCI અને ક્રિકેટ એસોસિએશન ઓફ બંગાળ (CAB)નો પણ આભારી છું, જેમણે મારી પ્રતિભા પર વિશ્વાસ મૂક્યો, મને આગળ વધવાની તકો આપી અને મારી ક્રિકેટ સફરમાં મહત્વપૂર્ણ ભૂમિકા ભજવી. તમારું સમર્થન અને વિશ્વાસ મારા માટે હંમેશા ખાસ રહેશે. ભલે મેં ટેસ્ટ ક્રિકેટમાં મારો છેલ્લો બોલ ફેંકી દીધો હોય, પરંતુ ભારત માટે રમ્યા હોવાનો ગર્વ હંમેશા મારા હૃદયમાં જીવંત રહેશે. આભાર, ટેસ્ટ ક્રિકેટ.”
મોહમ્મદ શમીએ 2013માં વેસ્ટ ઈન્ડિઝ સામે ટેસ્ટ ક્રિકેટમાં પદાર્પણ કર્યું હતું. આ એ જ શ્રેણી હતી જેમાં દિગ્ગજ સચિન તેંડુલકરે તેની છેલ્લી ટેસ્ટ મેચ રમી હતી. શમીએ ભારત માટે 64 ટેસ્ટ મેચ રમી છે, જેમાં તેણે 122 ઇનિંગ્સમાં 27.71ની સરેરાશથી 229 વિકેટ ઝડપી છે. એક ઇનિંગમાં તેનું શ્રેષ્ઠ પ્રદર્શન 57 રન આપીને 7 વિકેટ લેવાનું રહ્યું હતું. આ સ્ટાર બોલરે છેલ્લી ટેસ્ટ મેચ 2023માં ઓસ્ટ્રેલિયા સામે રમી હતી. જે વર્લ્ડ ટેસ્ટ ચેમ્પિયનશિપની ફાઈનલ હતી. ટીમ ઈન્ડિયા તે મેચ હારી ગઈ હતી, અને ત્યારથી શમીને ટેસ્ટ ફોર્મેટમાં ફરી તક મળી નથી.