પીએમ મોદીની બાયૉપિક ‘પીએમ નરેન્દ્ર મોદી’ અત્યારે ચર્ચામાં છે. ફિલ્મમાં વિવેક ઓબેરૉય પીએમ મોદીનું પાત્ર ભજવી રહ્યો છે. વિવેક ઓબેરૉય પીએમ મોદીનાં લૂકમાં જામી રહ્યો છે. વિવેક ઓબેરૉય ઉપરાંત આ ફિલ્મમાં ઘણા બીજા એક્ટર્સને પણ કાસ્ટ કરવામાં આવ્યા છે. જો કે એક પાત્ર એવું પણ છે જેના પર સૌની નજરો ચોટી રહેશે. એ પાત્ર છે પ્રધાનમંત્રી નરેન્દ્ર મોદીની પત્ની જશોદાબેનનું. પીએમ મોદીની બાયોપિકમાં આ પાત્ર માટે એક્ટ્રેસ બરખા બિષ્ટને કાસ્ટ કરવામાં આવી છે.
આ અંગે વાત કરતા બરખા બિષ્ટે જણાવ્યું કે, “આ ફિલ્મ માટે અમે અમદાવાદમાં શૂટ કરીશું અને આ વિશે મે ઘણું વાંચવાનું શરૂ કરી દીધું છે. આ રૉલ ઘણો ચેલેન્જિંગ છે કારણ કે જશોદાબેન વિશે લોકો ઘણું જ ઓછું જાણે છે.” બરખાએ વધુમાં કહ્યું કે, “મારે આ રૉલ માટે ગુજરાતીઓની માફક બોલવાનું શીખવું પડશે. આ કેરેક્ટરમાં તમને ઘણા શેડ્સ જોવા મળશે. હું અત્યારે ફક્ત એટલું જ કહી શકુ છું કે આ ફિલ્મ સાથે જોડાઇને મને ઘણો જ ગર્વ થઇ રહ્યો છે.”
પીએમ મોદીનું પાત્ર નિભાવી રહેલા વિવેકનું માનવું છે કે પીએમ મોદીનું પાત્ર તેના જીવનનું એક મહત્વનું પાત્ર છે અને હોય પણ કેમ નહીં આ ફિલ્મમાં પીએમ મોદી જેવા બનવા માટે વિવેકે ઘણી જ મહેનત કરી છે. આ ફિલ્મનું શૂટિંગ ગુજરાત, દિલ્હી, હિમાચલપ્રદેશ અને ઉત્તરાખંડમાં થશે. ઉલ્લેખનીય છે કે ફિલ્મનાં પોસ્ટરને 23 ભાષાઓમાં રજૂ કરવામાં આવ્યું હતુ. ફિલ્મની ટીમ છેલ્લા 2 વર્ષથી આ પ્રોજેક્ટ પર કામ કરી રહી હતી. ફિલ્મને ઓમંગ કુમાર નિર્દેશિત કરી રહ્યા છે. તેઓ આ પહેલા ‘શરબજીત’ અને ‘મૈરી કૉમ’ પર બાયૉપિક બનાવી ચુક્યા છે. ફિલ્મનું પ્રોડક્શન સંદીપ સિંહ કરી રહ્યા છે.