IPL 2026ની ફાઈનલ મેચને લઈને ક્રિકેટ ચાહકોમાં ભારે ઉત્સાહ જોવા મળી રહ્યો છે, પરંતુ હવામાન વિભાગની આગાહીએ આ ઉત્સાહ પર પાણી ફેરવવાની શક્યતા ઉભી કરી છે. આવતીકાલે અમદાવાદના નરેન્દ્ર મોદી સ્ટેડિયમમાં રમાનારી RCB અને GT વચ્ચેની ફાઈનલ મેચ દરમિયાન વરસાદ વિલન બની શકે છે.
હવામાન વિભાગના અનુમાન મુજબ અમદાવાદમાં આવતીકાલે પવન સાથે મધ્યમ વરસાદ પડવાની શક્યતા છે. મેચ દરમિયાન ગાજવીજ સાથે વરસાદી ઝાપટાં પડવાની આગાહી કરવામાં આવી છે. જેના કારણે મેચના આયોજન પર અસર પડી શકે છે.
માત્ર અમદાવાદ જ નહીં, પરંતુ સમગ્ર ગુજરાતમાં આગામી 4 જૂન સુધી વાતાવરણમાં પલટો જોવા મળી શકે છે. ઉત્તર ગુજરાત, મધ્ય ગુજરાત, સૌરાષ્ટ્ર અને દક્ષિણ ગુજરાતના અનેક વિસ્તારોમાં ગાજવીજ સાથે વરસાદની શક્યતા વ્યક્ત કરવામાં આવી છે.
હવામાન વિભાગે રાજ્યમાં 50થી 60 કિલોમીટર પ્રતિ કલાકની ઝડપે પવન ફૂંકાવાની પણ આગાહી કરી છે. કેટલાક વિસ્તારોમાં વીજળીના કડાકા-ભડાકા સાથે વરસાદ વરસી શકે છે.